Cee fuh Satar snitch pun heself…again

Oct 03, 2014 Dem Boys Seh, Features / Columnists, News

Every day people does get a shock. De shock could be seeing somebody who dem ain’t see fuh a long time or something really serious. A woman see a man get knock down pun de road and she head get light and she faint. Same way people does faint or get blackout when dem see something strange or out of de ordinary.
Cee fuh Satar get blackout Wednesday morning when he open de Waterfalls paper. De next thing de people in de house hear a noise like when breeze blow down a jar or something heavy. Is fall de man fall. Right away he family know that he had to get oxygen. Dem call out to de neighbor fuh help, but people know how de man stay, so dem just peep through dem window.
This is a man who does jump pun he desk or holler at de top of he voice when thing face he. One day he might jump through he office window.
Dem boys don’t mek joke wid sickness, but this thing was suh strange that dem had to talk. One neighbour seh that he see when de DOCOL truck pull up and he think was a normal delivery of cooking gas. Is afterwards when dem see de colour of de gas bottle and dem see people running in wid oxygen mask that dem realize was oxygen and that something bad happen to Cee fuh Satar.
Dem boys seh that is another e-mail he see in de paper from heself that mek he collapse.
When he ketch heself he family ask he wha happen and he seh, “E-mail gun kill me.” Dem ask he how and he seh wicked things is not good to do. De Creatah always does expose de wicked.
And that is how he think he mek a mistake. He send de wrang e-mail to de righteous Lall and is de Creatah mek that possible. That is how he snitch pun heself.
Talk half and piece, piece of de hard drive gun come out.

Discover more from Kaieteur News

Subscribe to get the latest posts sent to your email.

Latest News