Latest update May 3rd, 2026 12:19 AM
Latest News
- Town Week Inter Ward Football: Blueberry Hill/Alleys/Valleys/Christianburg crowned inaugural Champion
- Toka Village, Region Nine wins Caribbean Tourism Organization Community-Based Tourism Award
- When Everyone Is Smart, Who Gets Chosen?
- BEYOND THE RUNWAY: Launch of Four Points by Sheraton Guyana
- Institutional betrayal in “One Guyana”
Dem boys seh…Everybody jailing dem corrupt leaders
Countries all over de world does lock up dem leaders who corrupt. Turks and Caicos had a corrupt prime minister and when he get a wink that de people gun jail he, de man run to Brazil. That didn’t save him. De Brazilians hear wha he did and promptly handcuff de SOB and ship he back.
By thiefing and cutting deals, he deprive de poor people of their basic needs—a decent meal, schools, water, churches, place fuh dem soo soo and even public place fuh dem doo doo. Now Haiti issue an arrest warrant fuh dem farma President Aristide. Dem want he fuh corruption, too. He been deh before and de people run he out. De Americans put he back and wha he didn’t get fuh tek de first time he double up de second time and run way.
Dem boys hoping and praying that de time gun come when Guyana gun issue an international arrest warrant fuh we farma president and some members of he Cabinet fuh de same thing. Dem got nuff to answer for, things that to this day people still asking question and can’t get no answer.
Brazzy can’t be lef out. He is de contact and contract man, he like write and formulate nuff clause wha he self can’t explain. When de handcuff gun go pun he hand dem boys want to see how he gun write. He might got to sit down pun de pen. And dem boys ain’t talking ‘bout goat pen and fowl pen. De pen might got some strong men inside.
Jagdeo, Rob de Earth and Brazzy was de key players in bringing Bai Shaan fuh rape all of we in Guyana; dem same three create de deal fuh de Indian logging company. He, Brazzy, join wid Jagdeo fuh sell out de profitable shares in de telephone company when de government and de people was getting billions of dollars every year.
Dem got nuff of dem who tek kickback suh till dem mek de people who get de deal believe that dem equal to dem. That’s why de Bai Shaan man tell de people at Linden when de people stop de truck, “Y’all betta move out de way. One telephone call would got y’all running out of Linden.”
Is only money or marriage does mek people get that kinda of power overnight. Well dem boys seh that phone call was not to Habeeb Khan, de comedian, or to Constable Jacobs. Jagdeo was in office and Rob de Earth was de man who had control over forestry and mining. De man had to be calling one of dem.
Dem give Bai Shaan de land and de power do anything. De company raping and bleeding de nation, shipping out de resources. Dem give up de same thing in Mexico and some other Latin American countries and settle in Guyana, because de sweetheart deal really sweeter than de greenheart seal.
In any country dem woulda have to explain dem assets. In Guyana is de reverse, you don’t have to explain you assets, you does boast about it wid friends and show off wid fancy swimming pool and things like that. Some of dem got gold cupboard and US$500,000 chandelier in dem house.
Is only time though. De arrest warrant gun come. Already some of dem nervous. And if dem think that dem gun run away like Aristide. Dem lie.
Talk half and get ready fuh hold on pun dem foot suh dem can’t run.
Share this:
Discover more from Kaieteur News
Subscribe to get the latest posts sent to your email.