Latest update July 24th, 2026 12:30 AM
Latest News
- MV Barima Disaster… 72 confirmed dead
- Parliament must determine COI’s composition for MV Barima probe – Dr. Campbell
- Nine victims of MV Barima tragedy laid to rest
- Transparency Int’l Guyana demands IMO probe of MV Barima tragedy
- Police detain, then apologise to, peaceful protesters at national vigil for MV Barima victims
Dem boys seh…Cane cutter gun strike next when ants bite dem
Today is de holiday call Good Friday. That is de day when some people in de world mourning. That is de day when some of dem does pray fuh things to happen.
Dem boys praying fuh de Lunch Man. He talk how he sick and he moving closer to de Creatah.
He promise dem boys that de few more morning he got on earth he gun only talk de truth. He start fuh repent, and one of de things he seh is that he regret how much he lie fuh de previous president. Then he lie fuh Bobby and Brazzy. Now he repenting, and this happening in Holy Week.
But that is not de only thing that ketch dem boys eye and ears this week. De other Bar Rat at GPL seh that he want 10,000 pole. Dem boys find out that he ain’t want dem fuh GPL. When de newspaper report that he want 10,000 pole, dem boys seh was a slip of de tongue. Really, he was looking fuh a 10-inch pole fuh de fat crook.
He and Jagdeo did tell de nation how dem gun modernise de sugar industry. Then dem seh how dem spend over US$200 million pun de Skeldon factory. That amount of money that dem spend pun one factory alone mek dem cane cutter believe that dem didn’t have to go in de cane field fuh cut cane. Dem believe that dem gun fly in plane fuh chop cane. Jagdeo and Brazzy lead dem cane cutter up a gum tree.
Dem boys know this when a snake bite one of dem cane cutter in de field. He was de one who holler and seh that he didn’t believe that he had to go back in de cane field by foot.
He call pun dem sugar worker fuh strike and dem strike. Dem cane cutter also believe that all de money wha dem seh dem spend woulda get rid of every dangerous reptile, including that same snake wha bite that cane cutter.
Dem boys seh laugh is laugh and fun is fun. Dem cane cutter want some good lash. Cane cutters of all people striking because a snake bite one of dem colleague.
That is like a school teacher shutting down de entire school because chalk get in she eye, or a newspaper pressman get vex because ink touch he finger.
Dem boys seh that fuh too long de politicians treat dem cane cutter like babies. Dem boys don’t need dem. Is de politicians that need dem fuh dem vote.
De politicians got to get serious wid dem cane cutter, because de next thing you gun hear is that de entire sugar industry shut down because a few ants bite one of dem pun he li’l toe.
Talk half and tell Bar Rat that dem boys got de 10-inch pole wha he looking for. And dem boys got a lot.
Share this:
Discover more from Kaieteur News
Subscribe to get the latest posts sent to your email.