Latest update September 18th, 2026 10:25 AM
Dem boys seh…Rob de Earth is a gold vendor
It ain’t got a day that somebody ain’t find something to talk bout de people who leading de country. Even a Chinee man seh how dem know bout corruption in dem country but this country beat all. That is how Chinee come to Guyana because de people hear that Guyana got a university that does teach corruption and when you graduate you can go anywhere and mek good.
Rob de Earth don’t deal wid money. That don’t mean that if somebody give he a small piece he wouldn’t tek it but wid anti-money laundering if he got too much money then he in trouble. That is why de Chinee now in de gold business. Dem dealing wid de earth and Rob de Earth keeping sweet wid dem.
Some of dem does deal wid land because dem claim that land don’t spoil and if dem got land dem can convert it to anything. De rat convert he land to foreign currency which he use to send to Miami till a shipment get hold up.
Dem boys seh that is one of he friends who like sing to de Feds mek that happen. This was de man who ship two container of gifts to de Rat fuh construction purposes. In return de man get land over de river and one near to de Pee Pee Pee paper. Since he get jail de things collapse and de Rat money get seize.
But dem got other things like gold. Right now, when a shipment go out de Feds does ask if is everybody in Guyana got a dredge. Nuff Minister who know that de anti-money laundering legislation was coming start fuh ship out gold.
Is only now dem got a problem. De buyers asking too much question. Dem boys seh that de plan is to bury de extra gold but one thing, who do de burying got to keep a map. People mustn’t be surprised if dem see two men wid gun standing in an open pasture. Know that dem got gold in de ground.
Talk half and pray fuh de corruption done.
Share this:
Discover more from Kaieteur News
Subscribe to get the latest posts sent to your email.