Latest update September 18th, 2026 10:25 AM
Dem boys seh…Dem Minister like prison warden
Nuff contract getting cheap. De Marriott contract price come down, de airport expansion contract get cheap and dem boys waiting fuh see what more gun get cheap. It got to be that somebody find out that sometimes dem contractor does put on an extra piece fuh pay off de very people who awarding de contract.
Dem boys want to know if de Waterfalls paper wasn’t peeping into everything if things woulda get cheaper. Fuh sure, nuff things woulda been more expensive because dem boys notice that that was de trend in de past. A road use to cost $10 this month and next month same road cost $100. That is how de money use to come out de treasury.
Anyhow, dem got a project that gun mek people eye open. Instead of de Demerara Harbour Bridge Guyana gun get de Demerara Harbour tunnel. De authorities plan fuh dig underground.
Now imagine dem gun got to put in things fuh clear out de fumes in de tunnel and if a car break down is hell. But some people gun vex. Dem have people who like de bridge because dem can commit suicide. Dem can’t do that in de tunnel.
Dem have another thing that dem boys notice. Quietly dem planning another road fuh run alongside de one that going to Timehri. Now that gun be a blessing in disguise because already dem using a helicopter fuh see if dem got a trail.
De road as it is got too much car and big truck and horse cart. When all of dem deh pun de road is traffic jam. But it good fuh de police because is more road that dem got under dem control. More road mean more money.
That mean that de government ain’t got to worry about giving de police increase pay. Dem done know that de prison wardens does feed demself from de prisoners food. Dem does go wid dem two long hand and come out wid black plastic bag.
Dem boys seh that dem like some government minister who does go in de wuk wid nutten and come out wid de hand full. Plastic bag too small.
Talk half and try to be a government minister.
Share this:
Discover more from Kaieteur News
Subscribe to get the latest posts sent to your email.