Latest update February 5th, 2026 12:35 AM

Guyana's largest selling daily and New York's most popular weekly

Latest News

Dem boys seh…A well hole more expensive than gold, ask Irfaat

Nov 08, 2012 Dem Boys Seh, Features / Columnists, News

De government, especially Irfaat, get more bareface. Long time when de government had to dig a well it use to cost little or nutten. When was Shaik Baksh a well use to cost $40 million. Now de man who tek over from Shaik digging dem same well  it cost $70 million.  Now overnight de same well cost $174 million.
When dem boys ask how come de well suh dear, de Tender Board people, including Don Duckloo, claim how de well digging to Trinidad. Guyana going to import water.
De man who put in a tender fuh dig de well is a Bee. Only a Bee coulda come up wid such a high price. Dem boys seh that people shouldn’t be surprise if de well price meet $200 million by Christmas. And by 2013 it gun meet $400 million.
De way things going, don’t be surprise fuh hear that a latrine hole cost $200 million. And Uncle Donald want glasses. He can’t see wha happening. He can’t see that all dem contract price jack up.  He does sit down in Cabinet whole day and hear dem same high price because all he Minister got to guh to he fuh approval.
De same Cabinet discuss Brazzy and he hotel. Luncheon confuse de situation too. He tell dem boys no matter how much money dem spend pun de casino, is still Brazzy own. Brazzy got to come clean and explain de statement. In fact, he need to explain de whole Marriott deal to de nation.
Is de people money and dem have a right to know.
Talk half and start worry bout de other half.

Discover more from Kaieteur News

Subscribe to get the latest posts sent to your email.

Similar Articles