Latest update June 13th, 2026 12:39 AM
Dem boys seh…Protest mek old man walk far
Long before dem people in Agricola decide fuh start blocking the streets again, de whole country did know. Was like if somebody tell somebody and de word spread. Before bird wife wake people calling to find out if people blocking de road at Agricola.
Nutten wasn’t happening suh some people think was just rumour people spreading. De police hear de same rumour and dem prepare demself. Dem boys seh that de protest wha some people plan was just a chance fuh rob people.
De last time dem who decide fuh rob people collect more cell phone than a store. One man get ketch wid three. He tell de police how he buy dem. Police does do stupidness but dem ain’t stupid. One of dem call a number pun de phone and a lady answer. Was she friend phone de boy had.
But dem boys seh that what is play fuh li’l boy is dead fuh crappo. De attempted protest nearly kill an old man who live in Agricola. De old man been in a minibus and he beg de driver to stop at Agricola road head. De people in de bus accuse he of setting up de bus fuh he grandchildren rob de passengers. De bus driver mek de man walk back from Eccles.
Dem boys want to know how come nobody from AFC, APNU or de government does get caught up in de traffic whenever Agricola decide to behave bad. Is like dem does get advance warning.
And while people talking bout protest another set talking bout how man killing woman. Another one kill he wife because she lef he and right away dem boys notice that de same thing happening at de same time in de US. Is three woman dead in two days.
Talk half and keep half fuh Agricola
Share this:
Discover more from Kaieteur News
Subscribe to get the latest posts sent to your email.