Latest update May 14th, 2026 12:35 AM
Latest News
Dem boys seh…De problem is Shite Global
De whole government happy over de signing fuh de Amaila Falls deal because is money galore fuh nuff of dem. De country gun get nuff lights too although de falls can’t supply de whole of Guyana.
When dem boys talk bout de money people claim how dem is anti-government and accuse dem of stalling progress. Dem boys stay quiet till now. Dem decide fuh spill de beans because dem know that if dem don’t talk now dem might never talk again because sympathy does tek over.
When Brazil tell Guyana, through Bharrat, that dem gun build de road all de way through to Linden, Bharrat reject de offer. People didn’t understand why till a man tell dem that Bharrat got nuff friends and all of dem got to get a piece of de road. Bee Kay got to get a section; Naught got to get a section; and Brazzy got to get he advisor fee. Don’t talk wha other people gun get.
Is de same wid de hydro project. When Bharrat announce it he seh that de project gun cost US$550 million. That was a reasonable price till Shite Global announce that it had de contract. Right away de cost go up. It now cost US$840 million.
When dem boys ask Bharrat why, he seh that was risk insurance that push up de cost. Dem boys seh that de Chinee people didn’t think that Guyanese woulda bun down de falls; dem didn’t believe that de Guyanese people woulda hijack de workers. Wha dem was telling people was that dem didn’t trust Shite Global. That is de risk and fuh that Guyana got to pay a further US$200 million.
What is de risk? Dem Chinee people don’t want to tek chance that Shite Global gun run away wid dem money. Of course if Shite Global run away wid de money don’t ask who gun get de lion share.
Talk half and think bout paying back fuh dem big projects.
Share this:
Discover more from Kaieteur News
Subscribe to get the latest posts sent to your email.