Dem boys seh...Bharrat get voice mail

Dem boys seh…Bharrat get voice mail

Apr 17, 2011 Dem Boys Seh, Features / Columnists, News

De Waterfalls paper got some people who wuss than anything anybody ever see. Indian cricket league playing and de Waterfalls boss man decide to bet some of de staff. De man win de first set of bet but he got people who wuss than any income tax collector or Customs officer or GPL meter reader.
He wake up de other day and de staff tell he how dem win. De man want to know since when he can bet when he sleeping. Is then he find out that de staff watch de match and pick which team win. When de boss wake up dem tell he that dem win de bet.
Well dem boys seh that only a stupid boss woulda fall fuh that. All bets cancel. But dem got more stupidness in de place. Dem boys get invite to a ribbon-cutting at Colgrain House. Was a pool dem recondition.
Well dem boys seh that if people cutting ribbon fuh a recondition pool when de government ready fuh open de new Olympic pool dem got to have wire rope and Bharrat gun have to do de cutting—but wid scissors just like all de time. He smart. He might want to use a cutting torch but dem boys seh not this time.
And dem boys know why he still vex and why he cussing out all de time. He call Donald fuh discuss de way forward and he get voice mail. “I am not available right now, but thank you for caring enough to call. I am making some changes in my life. Please leave a message after the Beep. If I do not return your call, you are one of the changes.”
Dem boys seh that was de wuss thing that Donald coulda do and since Bharrat can’t do he nutten de man tekking it out pun everybody else.
Talk half. Lef half.

Discover more from Kaieteur News

Subscribe to get the latest posts sent to your email.

Latest News