Dem boys seh....Who gun pay fuh de rope?

Dem boys seh….Who gun pay fuh de rope?

Oct 25, 2010 Dem Boys Seh, Features / Columnists, News

When people like read dem does find nuff interesting thing. Dem read something about China and dem find out that when people thief nuff dem does get execute by firing squad. That is common knowledge. What dem boys find surprising was that de family of de man who get shoot had to pay fuh de bullet.
Right away dem boys start fuh think bout execution in Guyana. In Guyana dem does execute by hanging. De only thing is that dem don’t execute people who thief unless dem kill when dem thief. Now dem want fuh know if dem would have a law which gun mek de family of de people who getting hang pay fuh de rope.
And dem also want fuh know if dem would start hanging people who thief like dem does do in China. If that is de case dem boys seh that is nuff people gun get hang. Dem also want fuh know if Guyana gun have enough rope.
Dem boys seh that de gallows gun wuk plenty. Dem have de regular thief man. Then dem have dem thief man who does use gun. De hangman might spare dem and lef dem in jail. De hangman gun start wid some of dem contractor. Then dem gun move on to dem who awarding de contract and getting drawback. Then dem gun move on to dem politician who does tip off de contractor and then collect from de contractor.
De last people dem gun hang is dem politicians. In fact, dem boys believe that by de time dem done hang dem wouldn’t have politicians and of course, that might be de best thing fuh Guyana.
Talk half. Lef half.