Is goat and sheep if things continue

Jun 12, 2009 Dem Boys Seh, Features / Columnists

Dem boys remember how dem get vex when Bharrat get involve and mek de NCN Board tek back dem decision to suspend Fuzzy. Was one set of talking and grumbling but none of de Board members coulda seh anything because Bharrat don’t like rudeness.
Well somebody had to talk to Bharrat bout de grumbling because he call Fuzzy and was shame bush pun shame bush. He tell Fuzzy that he had to wuk wid de Board and don’t give dem no trouble.
Right away dem boys remember how dem mother use to tell de wicked one how he got to behave or else. But when de same man behave bad de mother does do de same thing and issue another warning. But one man seh that Fuzzy ain’t no ordinary bad child because dem had a man name Karan and he did think he was bad. He deh in Canada crying.
Dem boys seh that dem had another bad man name Roger Khan and he deh in de States crying too. He lef some good men back in Guyana but dem boys now hearing that some of dem same good boys ending up in trouble. Two of dem got de police after dem fuh murder.
De police still laughing over another case. Some bad man go to a school and threaten some teacher because dem had cause to talk to he children. Dem boys know that people does exaggerate suh when dem hear that de man pull a gun pun de teacher dem decide fuh check.
Not one teacher see a gun but dem claim how de man had a gun. De story get suh big that some lady send fuh de police and de same lady want de police to lock up dem teacher. De policeman start fuh laugh.
He end up laughing more hard de next day when de teachers tun up fuh school and de school padlock. Is only security guards and watchman does padlock gate but de school ain’t got none. Is de parents in de community who lock up de gate. But de same people ain’t want dem children go home because is trouble. Suh get wha dem do; dem stand up right there and mek sure that no teacher or student move from de school.
Is then de police get nervous and dem pull out de stop and arrest de parent who start de trouble. And even de parents refuse fuh remove de padlocks. One of dem claim how she read in de papers that Berbice High School do de same thing and it wuk because de teacher get back de wuk.
Well dem boys waiting fuh today fuh see if de gate gun open.
And dem boys seh how dem country people tekking de carbon credit thing serious. Dem use to cook outside because dem didn’t want de smoke in dem house. Well when dem hear bout global warming dem stop cooking outside. Dem cooking inside because dem claim how de smoke gun stay in de house and protect de environment.
Bharrat got a new problem because is nuff children going to school wid red eye from de smoke. Some of dem got cough and all of dem smell like smoke herring. De house ain’t got mosquito and that must be de only advantage.
Dem got other smart people. Imagine a youth man carry some of he colleagues fuh buy a gun. He foot break suh he can’t walk properly. He sit down in de car. De people who selling de gun tell dem fuh go to a spot and that dem gun come.
Up come de man wid de gun and right away he shoot de people who come fuh buy de gun and he tek way dem money. But de young men parents didn’t hear de full story till de police get really tough.
Three people in a car, two get shoot and one of dem ain’t get touch. Is nah time to get suspicious? Well de police smart and that is how dem know de story. Dey looking fuh de man who do de shooting just like how a woman soldier looking fuh some mercy.
She stab she man and when she go to court she beg fuh a chance. She deh in jail and dem boys seh that she getting more than she bargain for.
But de magistrate shoulda have some sympathy because in two days is three woman get stab up by dem man. One of dem dead and de other deh bad in hospital. Dem boys seh that at de rate dem men disposing of de woman just now dem would have to resort to goat and sheep.
Talk half. Lef half.

Discover more from Kaieteur News

Subscribe to get the latest posts sent to your email.

Latest News