Do suh, nah like suh!

Apr 02, 2026 Dem Boys Seh, Features / Columnists

(Kaieteur News) – Yuh ever notice how when people driving and dem miss dem turn, suddenly every lil bridge in de country become public property? Is either dem backing in like dem parking fuh night, or dem swinging in and reversing out like dem auditioning fuh some driving school video.

Dem boys seh, every driver know de routine. Yuh reach, yuh ease in, yuh back out, and yuh gone ‘bout yuh business. Simple. No big science. No PhD in turning required.

But leh me tell yuh—de minute yuh use some people bridge fuh turn, is like yuh commit high treason. Next thing yuh see: big brick plant down like dem building seawall extension. Chain stretch cross de entrance like dem guarding Fort Knox. One man nearly put up sign: “Turn here and face consequences!”

Dem boys seh is funny how dem same people does jump in dem car and use everybody else bridge like dem inherit de whole street. Dem ain’t see no chain when dem doing dem own three-point turn. Hypocrisy got more mileage than dem car!

Some of dem does come out shouting too, like yuh just thief dem electricity. “Eh eh! Don’t use me bridge!”—but if you watch dem later, dem reversing pon Miss Sheila bridge next door like dem practising choreography.

Guyana got a special breed of people: dem nah want yuh use dem thing, but dem feel entitled fuh use yours. Dem boys seh if selfishness was petrol, half de country woulda never run outta gas.

But hear de best one yet—one fella claim people wah turn on he bridge does intimidate he. Intimidate! Dem boys nearly choke pon dem tea. Is a bridge, not a crime scene!

Dem boys she, how he know dem people turning late at night? He watching through de window like night watchman—or he doing surveillance shift in he pyjamas? One man seh maybe he got “Bridge CCTV”… which really mean he curtain slightly open and he eye doing overtime!

Now dat remind dem boys of one driver reversing a big truck up a narrow hill. Lil boy see dis and ask, “Boss, why yuh nah drive forward?”

Driver seh, “Track narrow. If I can’t turn up deh, I gon be stuck.”

Lil boy nod like he just learn physics.

Few minutes pass, and de same truck coming back down… in reverse again! Lil boy confuse now.

“Wha happen, boss?” he ask.

Driver seh, “I find a place fuh turn.”

Talk half. Leff half.

Discover more from Kaieteur News

Subscribe to get the latest posts sent to your email.

bad driving, Dem Boys Seh, driving school

Latest News

Do suh, nah like suh!

Discover more from Kaieteur News

Similar Articles

Leave a Reply Cancel reply

Listen to the The Glenn Lall Show

Follow on Tik Tok @Glennlall

THE BLUNT OF THE DAY

Sports

Reddy (4-8), Bishop (37) set up crushing 76-run win for Guyana

VIEW ALL SPORTS

Features/Columnists

Is OFAC politically neutral?

Sir. Ronald Sanders

The Cost of Silence: How the OAS is Undermining its Own Relevance

The GHK Lall Column

Judas in Guyana -Part III- Exxon

Publisher’s Note

Weekend Cartoon

Bridge Watch

> Berbice Bridge […]