Parliament is a place to sleep

Dec 07, 2018 Dem Boys Seh, Features / Columnists, News

Sityra Gyal tear off in de Parliament Wednesday and all because de new Education Minister give back $2 billion to de treasury.
She seh dat money coulda do nuff things; it could build two house fuh a comrade, it coulda buy more Chinee food than people could eat and it could buy some plane ticket. Above all, it coulda buy a house fuh ten people in Pradoville.
But Poor Nicolette, all she know fuh do is spend and when duh done, wha she got to do is give back de money. She is not de only one who get cuss up fuh dem wuk how dem know it. Then things get so far dat people start to mek up story.
One man claim how de government spend more than $1 billion pon travel. When de government hear dat, dem cuss. Then dem decide to tell people how de opposition lie. Wha dem don’t realize is dat when something sound nice, dat is wha people does believe.
Dat is how dem got nuff rumour going around. People seh how Jagdeo got nuff outside children. Dat sound more nice than de truth. When dem people seh how Soulja Bai suddenly build big house months after he tun president, dat sound nice too. People like to hear how de big ones thief.
When Soulja Bai seh is he brother house and he tek control, de people who start de rumour didn’t even seh nutten. De truth wasn’t nice. Parliament boring and dat is de truth but because of de food and de small piece dem don’t seh nutten bad bout dem sittings.
But dem boys got de evidence. Dem got photos of MPs sleeping, some playing candy crush and some reading Dem Boys Seh while Sityra Gyal mekking she argument. Dem pon de government side does get people to write dem budget speech. Then dem does read. De odda day, one of dem read de mistake and everything wha de person write.
Talk half and hope everybody don’t sleep in parliament at de same time.

Discover more from Kaieteur News

Subscribe to get the latest posts sent to your email.

Latest News