Latest update February 6th, 2025 7:27 AM
GTT selling Blaze but giving people smoke
Clement Rotie sit down and seh how goat ain’t bite him. That was when dem boys ask him if he gun run fuh president.
Dem boys seh if goat bite Rotie then wild cow kick Simona. She been doing a set of stupidness and hanging out wid a set of roughnecks and scamps since Soulja Bai mek she a Minister.
One of dem deh in front de court right now.
De odda night she cause trouble. Dem boys seh she had to be smoking something and it couldn’t be ganja. She was high suh till she see double. She even see a man pointing a gun at she.
People does forget that almost every business got cameras. And dem cameras don’t sleep. When Simona tackle de security guard de man didn’t know if she was still suffering from de wild cow kick or from wha she smoke.
Yesterday when she head stop spin and she brain clear she seh everybody lie pun she. She seh even de CCTV camera lie pun she, too.
Dem boys hear she didn’t tun up to wuk yesterday thinking she could hide from Soulja Bai.
Is not she alone does tell lie. GTT does tell bigger lies day after day. Dem had a scheme fuh rob de Guyanese people. Is only de odda day dem boys find out how dem doing it.
De Waterfalls paper have to use de internet to upload de newspaper every night so people any part of de world can see it when dem wake up.
De workers suppose to be going home to sleep in dem bed. Instead dem going home day clean every day because of de slowness of de internet.
De Waterfalls paper buy anodda internet bandwidth just to speed up de system so de workers can go home and sleep in dem bed.
Lo and behold, same thing going on. When de company do in house speed test dem getting less that half de bandwidth GTT charging dem for.
Dem boys want to know wha you call that? Kokishness, scampishness of skullduggery?
When dem boys call dem, is different rigmarole and salla walla dem throwing at de company. One of dem tell de boss man, “Is true. Dem only tell you dem giving you five bandwidth but is only two dem give you.”
Dem is de people who advertise Blaze and give de customer smoke instead. That is like de con man selling rice.
He got two sign board sticking out from one tray of rice that seh $4 a gallon and $5 a gallon. Is de same rice but de measuring cups wha de vendor got that does mek de difference.
One is three-quarter pint and de odda one is a full pint. Which one you pay for is that you gun get.
GTT wuss than that. Dem giving you half pint and charging you fuh a full pint.
Talk half and don’t tek anything fuh granted from anybody, not even from Soulja Bai. Lately he been bob and weaving on so many scampishness.
Similar Articles
THE BLUNT OF THE DAY
Sports
Features/Columnists
Land, taxes and penalties
Peeping Tom… Kaieteur News-The American humorist Will Rogers once remarked that the best investment on earth is earth... more
OAS Secretary General Election and renewed OAS Consensus
Antiguan Barbudan Ambassador to the United States, Sir Ronald Sanders By Sir Ronald Sanders Kaieteur News- The upcoming election... more
Weekend Cartoon
