A man gone into hiding

Jun 22, 2018 Dem Boys Seh, Features / Columnists

Moon does run till day ketch it. Old people got another saying how every day bucket does go to well; one day de bottom gun drop out.
People wukking wid govt does always hustle de treasury. De smart ones know how to try to hide de money dem thief. Some of dem does build guard hut.
Dem boys realize that whenever de see a govt project, dem know that de real price is much less.
A guard hut wid some slab and two price of glass cost $1 million. De real price was $250,000. Somebody mek a bright small piece.
Dem had another scheme fuh rob de govt. De govt decide to feed school children. It share out nuff contract. People suddenly realize de govt stupid suh when a box of food worth $40 dem charge de govt $400.
Some of dem mek more money than dem ever see in dem life. But as old people seh, de longest rope got an end. Soulja Bai ask some of he people to carry out a forensic audit.
De findings mek some people faint. It mek people suddenly realize that dem friend who was always buying drinks and food was spending de extra money.
Now dem boys hear a man gone home and dem hear he carry more money than he salary. He was a man who anybody can call and he always answer he phone.
Last night dem boys want to know if this man gone to de moon because all de calls go to voice mail.
Of course, dem boys know that all that was free call and dem decide dem would call till he answer but dem realize that de story buss out and when things like that happen people does get serious belly wuk.
De man gone home and if Soulja Bai get he own way de police would collect every cent but dem and all does siphon off.
Talk half and watch how a rope come to an end.