Dem boys seh...BaiShanLin apply fuh more visa than it need

Dem boys seh…BaiShanLin apply fuh more visa than it need

Sep 05, 2016 Dem Boys Seh, Features / Columnists, News

When dem boys talk nuff people does believe dem mekking joke. Nuff people get vex when dem boys talk bout BaiShanLin and de things dem was doing but dem boys wasn’t de only one who was talking. De British and de Americans was talking.
Since 2013 dem boys suspect that something was happening when all of a sudden BaiShanLin was bringing in people to wuk and Guyanese never see de wuk. People come in to build some value added to de timber industry that BaiShanLin was involved in but no factory didn’t build.
Dem boys want to know why Donald allow so much Chinese come in to build a factory when no place ain’t clear fuh de factory or no factory part ain’t come in. De British was watching this and dem call Rohee. But that was like talking to a deaf man who tun he back to you. De Chinee keep coming in by de droves. BaiShanLin was applying fuh more visas than it need.
De Marriott people already had dem set of Chinee workers. Is only BaiShanLin and de airport people claim how dem had vacancy. At de same time dem boys did hear how BaiShanLin was bringing in jail men but de Ambassador kick up a fuss. He even refuse to tek some refreshment that de Waterfalls paper boss man did offer him.
Now dem boys hear that BaiShanLin was involved in human trafficking. That mean that somebody was tekking de people and promise dem wuk. David Daby shell out visa and Rohee give out work permits—some boys seh that people don’t do nutten fuh nutten.
When de Chinee come BaiShanLin put dem up in de hotel next to de Princess. From deh de people use to get ship out to de interior to wuk gold. Dem do everything except wuk in de timber industry. Some of dem complain how dem lose dem passport and that Guyana had to give dem one—for a fee from you know who.
Now dem boys want to know wheh all dem Chinee people who come to Guyana deh. If dem go to Venezuela dem got to run back to Guyana although dem can bear dem chafe. Some wukking in de stores and some disappear.
Talk half and start searching fuh dem who BaiShanLin bring.