Dem boys seh...Nutten tell lie pun Babbie

Dem boys seh…Nutten tell lie pun Babbie

Aug 12, 2016 Dem Boys Seh, News

Old people always seh ‘Come see meh is not come live wid meh.’ Soulja Bai see Nutten and tek de man into he Cabinet. Now de man tun out to be either a dumb SOB or a scamp. Larry buy a building in Albouystown in March fuh $25 million. He get transport in June.
This is wheh Nutten come in. He already give back Larry de $25 million claiming how he paying security deposit fuh de building. De man tell de Cabinet how he cut a deal wid Larry and he was right, because he promise to give Larry $12.5 million every month.
After he hatch de plan wid Larry, he go to Soulja Bai and de Cabinet to explain how he get a bargain from Larry. He tell dem that Babbie was charging $19 million a month and Larry gun only tek $12 million a month.
Right away Babbie tell de whole world how Nutten is not corrupt or spoil, but that he rotten. De man seh that he never charge a cent. Dem boys now want to know if Nutten was actually tekking de $19 million every month.
Dem boys seh that if Nutten did only tell de Cabinet bout he deal, he could argue that de people didn’t hear him properly, but de man tell de National Assembly de same thing. But people should have suspect that he was lying. This is a man who does talk smooth, but this time he start to stammer. He mek Stammer Joe look like stupidness.
It look like if Nutten eyes pass poor Soulja Bai. He sit down and try to fool de man. Dem boys seh knock got knock back. Soulja Bai gun knock him so hard that he head gun spin. As for Larry, people know that he is a wheeler and dealer. It had to be that he trap Nutten wid dem gyal he does got in de place.
Well is either Nutten pay back de $25 million or he get Larry to give back de taxpayers de money. Soulja Bai start an investigation and Jagdeo want Nutten go before de privileges committee. Dem boys want see him in jail.
Talk half and watch out fuh who else paying fuh nutten.