Dem boys seh...One doctor sorry he fight dem boys

Dem boys seh…One doctor sorry he fight dem boys

Aug 01, 2016 Dem Boys Seh, Features / Columnists, News

When de Waterfalls paper win de lawsuit against de doctor, nuff people was vex. Fuh one, de doctor was vex because he did want money to paper he bed. De spring was boring he skin and he didn’t trust de newspaper. He got to look somewhere else fuh de paper.
But was some people in de court who mek dem boys laugh. One of dem who rule that de Waterfalls paper must pay more than wha de first judge order get de news and he holler, “Damn” like if somebody ketch he wid he hand in de cookie jar.
But was de lawyers fuh de doctor who mek dem boys laugh. Dem spend dem money to do de case an dem lose suh it mean that dem can’t get de money dem plan. One of dem claim how he could get bankrupt.
But people know that nuff people see how de Waterfall paper successful and dem want mek money. One of dem who know that is de man who wouldn’t even go near any airport. He was de one who suing from long distance.
Dem boys willing to pay de man passage to come to Guyana. Dem even willing to provide transportation fuh he come from de airport if de police allow him to walk past immigration. If that can’t happen then dem boys gun sue de lawyer who want waste de court time.
But one thing is certain, somebody got to pay dem boys fuh mekking dem waste time. Now de man who did sue de Waterfalls paper got to pay cost. Fuh sure he can’t treat de court like how he treat he lawyers. He got to pay. He might end up paying all de money that he get in de first judgement and more.
Dem boys can now sit back and relax. De man above don’t sleep. He does always stay in the corner of the right and just. He in dem boys corner.
Talk half and keep following the Waterfalls paper.