Dem boys seh...Madness and corruption tek over Berbice

Dem boys seh…Madness and corruption tek over Berbice

Jul 31, 2016 Dem Boys Seh, Features / Columnists, News

Early next week three people going to court fuh murder. One of dem is a boy who ain’t even lose he mother features. Dem shoot three people in de back dam because de people didn’t run away when dem hear gunshot.
Now everybody know dem was thiefing fuel from a farm. Dem got a boat and every time dem want money all dem use to do was go to de farm and thief couple drum of fuel.
Dem boys seh it was a strange combination—three people go to ketch fish and three go to thief fuel. ‘F’ fuh fish; ‘F’ fuh fuel. When de dust settle, three people dead and none of de dead was thiefing fuel.
De people hear how is de youngest person in de thiefing group that do de shooting. What he was doing wid gun? Why nobody couldn’t stop him? And to think he own father been right there.
So dem going to court just like de set who tek great pleasure in chopping up some people dem go and rob. This set also had great pleasure in burning down a house wid a woman inside after dem rob de woman.
All this happen in Berbice and people now wondering if is something de people learn from somebody during the political fan out campaign.
Dem got another set who parading in Canje. This set always on de prowl, so much so that people can’t sleep. De thieves always want cash and jewellery.
Dem boys remember de time when a man and he friends been pun a raid and dem get some jewellery. Two days later de people see dem jewellery pun a woman. She see de necklace or de chain and like it so she put it on and walk about.
De set in Berbice got more sense. De people don’t see dem jewellery because even de devil got a friend. De thieves got goldsmith fuh friends. Is a nice cycle.
Talk half and watch wha corruption doing wid Berbice.