Dem boys seh...Is sheer talk and more talk

Dem boys seh…Is sheer talk and more talk

Jul 24, 2016 Dem Boys Seh, Features / Columnists, News

Is nuff talking going on. Everybody talking. De government people talking about fighting crime and Soulja Bai talking how he don’t intend to hang nobody.
From de time he seh suh, de murder rate gone up. Is like people was only waiting for a sign like how de three wise men wait fuh a sign when de Saviour born.
De Chancellor talking too. He talking bout night court. Dem boys was hearing bout night court since Janet was President.
Dem even had court in dew afternoon but after couple week dem Judges and Magistrate find out that dem prefer to go and drink rum in de afternoon so dem shut down de afternoon court.
Now de Chancellor talking bout night court. He ain’t talk about who gun preside over de courts or how much dem will have. All he seh is that Guyanese will go to court in de night.
People like a show. Just like how people does flock de court in de day when people got to go to wuk, imagine people flocking de night court instead of going to disco. Dem don’t have to pay.
Then dem got another set of talking. Dem got big problems at de hospital. Some people talking how de matron ain’t got manners and how she ain’t listening to de CEO. That story change suddenly. All of a sudden nurses start to accuse doctors of killing people.
Dem boys want to know if dem doctors is terrorist who does just kill people. Of course dem had some. One stitch up a man intestines. Another one give a man injection because de man hand break and de man dead.
But is de talking. A man who want to be matron talk till he had no choice but to talk fuh de matron. He walk round and he tell all dem ward sisters fuh stay home in protest.
Of course dem stay home. Now is a new talking. Everybody want to know how much credit dem use when dem been home.
All of dem at wuk today because dem can’t afford to stay home and talk.
Talk half and watch how everybody else talking.