Dem boys seh...Nuff money mek a big man choke

Dem boys seh…Nuff money mek a big man choke

Jul 01, 2016 Dem Boys Seh, News

Is nah fun to lef you house in de morning and got de police waiting fuh arrest you before you reach wuk. But then again, is only scamps can be in that position. Decent people does lef home, go to work and go back home without any problem.
Old people also quick fuh seh that moon does run till day ketch it. Day come and ketch a young moon who didn’t know when to stop siphoning off de people money. It was Jagdeo who was de first one to claim how de audit was a waste of time and how it only trying to embarrass he people.
This man wuk wid him. He see what was happening so he do de same and end up wid US$50 million in some bank account. One account had he wife money and although she only wuk wid this man she had more than $400 million in she bank book.
Dem boys seh that when dem see de money dem begin to get de idea wha use to happen. Somebody decide to tek out de money and pass it to this boy who would then bank it and ship it to different bank account. That is why nobody coulda seh Jagdeo tek money. Other people tek it for him.
But when illegal things sharing people does tek something fuh demself. This man proppa tek. Then he buy phone cards and claim that de revenue from de cards was really nuff. That is when dem detective ask him if he does buy de cards cash and keep all de sales money because that is not how de thing does wuk.
He start to tremble and tell dem how he mix up de phone card money wid dem other money. That is only de tip of what really happen when Jagdeo was boss. Brassington move couple million and everybody decide to move couple million.
People getting ketch and dem boys willing to bet that in de next few days nuff people gun disappear from de country. This is de set who bank dem money elsewhere but Uncle Sam promise to help track dem down.
Talk half and watch how greed skin up a man.