Dem boys seh ... Senna pass inside GRA

Dem boys seh … Senna pass inside GRA

Jun 28, 2016 Dem Boys Seh, Features / Columnists, News

De news spread like wildfire. C fuh Satar get send home. Dem boys seh that de people at de GRA had to suspect something. And when indeed dem check, de man had seven company car park up under he house. He even had a golf cart although he can’t play golf.
De place get nice; more money start to come in and people get vex because bribe cut out. Now in one day GRA shake up again. It mek dem boys remember when dem drink senna and dem belly tun up.
Dem move de lady who tek over from C fuh Satar and dem put another lady. Dem move some other people, then dem call a press conference to explain de changes. De man who mek all these changes was cousin to Matthew, Mark and John in de Bible.
He read de gospel according to Luke which seh that all of dem who get shake up dem never use to wuk. But in all de gospel one name wasn’t mentioned and that was de name of a man who spot something crookish at de airport wid some cargo.
Dem boys seh that nutten is secret in this place suh when de story appear in de Waterfalls paper right away people start to point finger. De truth is that dem boys did tell de whole country that if anybody got a complain to write to dem.
Luke talk bout all who get shake up but he didn’t mention one man name. He talk bout de change he mek in all dem department but he never seh that he knock off de man.
Right away dem boys seh that people think that this man tell de Waterfalls paper. If he did talk he would be de first man to get knock off fuh talking.
Luke seh is nutten like that but dem boys want to know why he, Luke, didn’t seh he knock off de man. Why de secret?
Now dem boys getting suspicious of wha going on inside de place wheh C fuh Satar use to hide. And dem intend to check. Dem want to know de reason why Luke talk half just like dem boys.
Talk half and wait fuh de hoorah.