Dem boys seh...Bee Kay now sporting in Bam Bam Alley

Dem boys seh…Bee Kay now sporting in Bam Bam Alley

Jun 26, 2016 Dem Boys Seh, Features / Columnists, News

Strange things happen since de country get a new govt. Dem boys use to sport at Bam Bam Alley and Bam Bam Alley ain’t got nutten to do wid Islam or terrorist activity.
Is set of roadside stalls that does sell beer and cutters cheap.
Dem don’t have money to go to Pegasus and Palm Court, Gravity and dem big shot place.
Dem place use to attract de Pee Pee Pee boys and de big contractors like Bee Kay and others. Bam Bam Alley is fuh de ordinary man who got a $2,000 in ee pocket because he can buy 10 beer.
Dem boys was surprise and shock to see Bee Kay sporting in Bam Bam Alley. Fuh a moment dem boys believe he was bruck. But dem see ee liming wid some people who in de loop.
Dem boys tek photo and one already gone to Soulja Bai so he can see and know who he people mixing and liming wid. Dem boys also got pictures of a lot of people who was in bed wid Jagdeo and wining, dining and liming wid de Pee Pee Pee boys, now dancing and singing soul songs wid de new leaders on de block.
How dem boys recognise Bee Kay was because he dress up in suit and tie while everybody else had on vest and three-quarter pants and slippers.
When dem boys ask him how he end up there is suit and tie, he seh this new set off leaders got empty pocket at this time. Is only time before dem start hitting Pegasus Poolside, and buying champagne by de bottles at de Marriott.
Dem boys seh Bee Kay was setting a trap just like how 1,700 people trap Guyana.
Dem seh dem come home back to live and bring in all dem duty free stuff, clear it and beat out back.
To this day de shaat man at de Foreign Ministry can’t even find 17 who living in Guyana. Dem boys hear he write a letter asking Jagdeo and Donald Dumb to explain.
Donald seh he don’t have no family who come back; all of dem is Jagdeo, Brassington and Ashni family.
Talk half and trace all dem crooks who suddenly become a Bam Bam Alley fan.