Dem boys seh...Minister singing solo in she white elephant

Dem boys seh…Minister singing solo in she white elephant

Nov 30, 2015 Dem Boys Seh, Features / Columnists, News

When people tek things that dem ain’t wuk for dem does end up holding on to a thing
that dem can’t even use. Dem boys see some people build mansion and palace and these things just like white elephant.
Georgetown got nuff white elephant wha dem people who mek dem want to sell and nobody ain’t buying.
Well dem got a lady who was a Minister who get nuff things that she couldn’t even think that she would ever own. She got a white elephant that she trying to use.
De other night dem boys pass by de place and dem hear a woman singing. When dem peep dem see this Minister singing. She alone and de Dee Jay in de place.
She couldn’t even get money to pay fuh de ice and de current that de Dee Jay use. People ain’t going in this place even if de beer giving away for free.
Is de same thing happen when a man build a bigger white elephant near to an old time funeral parlour.
When de man build this place he think that it gun be a powerful hotel. A food place rent it but never move in suh it stand up there gathering cobweb.
Jagdeo get a property in Queenstown fuh set up some foundation. He spend money to paint although dem boys seh that de paint come from overseas in a container from a friend who now waiting fuh Uncle jail him.
That building stand up so empty and fuh so long, that people actually go inside and thief out some things. That foundation is also a white elephant. Dem boys seh that all de people who got white elephant is people who cut deals wid Jagdeo.
Babbie got a big warehouse that he build because he sure that he gun buy all de drugs fuh de Ministry of Health and de hospital. That gun become de next white elephant.
Talk half and watch how wha don’t belong to people does end up as white elephant.