Dem boys seh...Take thy burdens wid thee

Dem boys seh…Take thy burdens wid thee

Nov 04, 2015 Dem Boys Seh, Features / Columnists, News

When people want to get rid of somebody dem does tell dem to carry dem burdens wherever dem going.
Is that habit of chasing people wid dem burdens that got some people always scrubbing out a new place when dem moving in.
Some of dem build a house so big that dem can’t even scrub it. That is de set who does pay a pandit nuff money fuh bun out de place and a priest fuh smoke out de place.
Brassington use a priest fuh smoke out de place. He friends thought that he had nuff mosquito till dem get de smell.
Dem who don’t like church or who don’t believe in religion does have nuff likker. Dem is de ones who does sprinkle de likker at de four corner and claim how dem giving dearly departed friends.
Well dem boys seh that of late nuff of dem had dearly departed friends, not that de friends dead; dem just departed because de good life done.
None of dem can’t get free money anymore. Babbie was one of de departed from Donald. He use to get free money now Soulja Bai come in to spoil de fun. He already cut back pun de drug contracts and now he tek away money that coming from de sky.
De Bishop is another departed. He had he church but he forget that de devil and de church don’t mix. Things get bad wid de church because it became de only church that fail to mek money. He had to sell it.
Dem boys seh that dem see nuff crosses in dem life but dem never see so many of dem refusing to associate. Dem remember when de going was good. Dem had some of de best parties because dem never had to pay fuh nutten. De taxpayer had to foot de bill.
De taxpayer money dry up and just like when ants eat out everything and move on, is de same way these people move on wid dem burden.
Kwame pick up heself and gone to Trinidad and of course when de immigration people see him one of dem shout, “Look at me crosses.” He still fetching he burden, face down.
Talk half and look out to see who coming wid dem burdens.