Dem boys seh...Woman hire killer pun credit

Dem boys seh…Woman hire killer pun credit

Sep 16, 2015 Dem Boys Seh, Features / Columnists, News

De situation wid de Berbice Bridge dutty. From de start was nuff secrecy behind it. Bar Rat, Brassy, Babbie and de Bridge people concoct an agreement that if people see it, it would expose dem duttiness from top to bottom and dem back plus dem front.
De Marriott arrangement is no different. De Chinee investors never come. Dem smell de Rat plus de fat cat.
Dem boys seh that dem got de Sun and Sand hotel people. De Rat plus Donald Dumb tun de sod fuh de hotel. Dem tell de whole of Guyana that it is on de move. Dem boys seh de only thing dem bastards didn’t tell Guyana was that dem was moving out de people’s money out of Guyana through Sun and Sand.
Instead de people see glowing hotel on de East Coast dem see shaking batelle in de Potaro area digging out we gold.
Dem same set of bastards bring a man who seh he been to a university that he never see in he life. Dem give him a big position wid a fat salary just like de fat crook who heading de power company.
Dem boys hear in de grapevine that half of de fat salary going to de person who employ him. This thing surface and dem boys frighten to tell Soulja Bai because dem eventually elevate de man without doing dem own background check. Dem buy pig in bag. Dem ain’t learn nutten wha dem boys talk all these years, not to trust de grass that Jagdeo walk on because not even an ass, much less a jackass, don’t want to graze on.
Jagdeo is such a disaster fuh Guyana that three-quarter of Guyana become scamp. Who don’t want to believe that just look at de type of crimes that people committing.
People even committing crime pun hire purchase now, all because money ain’t deh fuh pay cash. Only a few people got all de money stash away.
Dem boys ain’t calling name but dem was blowing whistle whole year.
Everybody know when you got to Courts to pick up a chair set or a bed you either pay cash or you put a down payment on de item.
Most people go to Courts wid down payment. Some does go to Singers, Lucky Dollar and Guyana Stores. One person go to a killer and didn’t even mek de down payment. She just mek arrangement fuh payment and she get she item.
Talk half, think carefully wheh Guyana heading. This ain’t happen overnight. Is years upon years it does tek fuh meet this stage. It does be nurtured.