Commander can’t tell truth even if he try

Jul 23, 2015 Dem Boys Seh, Features / Columnists, News

One of dem boys old buddy friend been watching a police commander a long time now. Dem boys ask him why you watching de man so much? Is because he shaat and he wearing Khaki uniform?

De buddy friend reply, “Eh, eh. He is not only dull, himself, he is de cause of dullness in others.” Dem boys agree because dem know and can remember nuff things.

Dem boys remember this man jump in a trench in Buxton and after two duck he bring up a gun wha none body couldn’t find. Soulja search and police search and couldn’t find that gun.

Everybody know that he jump in de trench wid de gun in he bukta. He do this because he want to live nice wid de man who look like de devil. He dance Dhaka Dhalay, Khanchan and even Luncheon fuh de administration fuh love him.

Dem boys got other things to expose. He is a man who does send people pun patrol and demand he share. Dem boys got other things to talk about. Dem, get really upset wid him Saturday night. Is then dem boys confirm how scampish he is and that he firmly in de skullduggery gang.

At de cricket ground in de midst of de traffic congestion he tun up to hear a complaint from one of he ranks about an assault by a Customs officer. He order an arrest and mek de Customs officer who de rank seh assault him get handcuff and throw in de back of a police jeep.

He put on he siren and go to Providence station to mek sure that dem lock up de Customs officer. He de khaki shaat man, do more than that. He report to he bass, Mr See-all how he had to lock up a Customs officer because de man slap up he officer.

Dem boys hear that he even tell de Minister de same thing.

Is when dem boys get a copy of de statement from de rank wha he seh de Customs officer slap up, that dem see how dangerous this senior police officer—a commander at that—can be. There was no slapping and the police in he statement never mention slapping.

This is a man who could send somebody to de gallows fuh no reason. He can lie and get a national award. De way dem boys see it, he can thief and become commissioner tomorrow morning.

People like him, dem boys got a message for. Keep clean because anything he do gun get skin up.

Talk half and find out how many people get rob when he was checking pun some assault.