Dem boys seh...Ex- Ministahs wake up calling fuh dem security

Dem boys seh…Ex- Ministahs wake up calling fuh dem security

May 25, 2015 Dem Boys Seh, Features / Columnists, News

Soulja Bai just sit down in de chair and people start fuh hot up he tracks already. Dem start fuh condemn de new Ministry, dem even condemn some of de people who tun Minister. Dem boys want believe is jealousy because some of dem want portfolio.
Dem ain’t even allow de man fuh warm de seat and dem start cussing. Is only couple day de man deh in and people seh he do nuff thing already. De li’l clean up wha he do already got de place smelling good.
Dem losers been in fuh 23 years and never initiate fuh a moment to clean dem own surroundings. Dem do a different clean up from Jagdeo and Donald right down de line. Some of dem clean de treasury and some of dem clean out de Ministry bank account.
Even at de end dem carry way vehicles. Ten Edghill must be de only one who nah get. He had to tek back de old car he give he brother in law. De rest of dem send vehicle and shock de Ministry wha didn’t even know so much vehicle exist.
Dem boys seh that it had to be that dem buy vehicle fuh dem Mooma, dem sweet man, dem sweet woman and even dem pickney. Dem even had security fuh all dem generation.
Dem boys had to laugh de other day when one ex-Minister, de Goat Man, wake up and call fuh dem security fuh tun on de pump fuh push water upstairs. Priya call fuh security fuh bring de newspaper.
When none body nah answer dem boys hear de Goat Man call Mr Seeall to complain. Seeall tell him that he is not Minister anymore. In fact, you shouldn’t even be calling me. You is an ordinary citizen. If you want security you got to spend you own money and hire private security.
Priya call de commander and de commander ask she if she dreaming.
Donald Dumb was driving down de road yesterday. He was going over de river to meet Irfaat and as soon as he lef he house he ask de security why de siren not on.
De security seh, “Boss you not president anymore. De Soulja Bai tek over de vehicle wid de siren.”
One of de security tell he fuh tek he mouth and mek siren.
Dem boys hear through de grapevine that de Rum Jattan seh he gun cut down all dem entourage wha Jagdeo tek fuh he self and Donald Dumb.
Talk half and smile fuh this change because it sure bring dese vagabonds to human level.