Dem boys seh... Guyana have more medals than de Olympics

Dem boys seh… Guyana have more medals than de Olympics

May 07, 2015 Dem Boys Seh, Features / Columnists, News

De government giving out deals like how de Olympic body does give out Olympic medals. When people tek part in de Olympics dem does win medals in three category.
De best athletes does get a gold medal; de second best does get a silver medal and de third one does get a bronze. Dem got to train fuh years upon years and run like horse and trot like a donkey fuh win a medal.
When it come to Guyana, it completely different. You don’t have to train, have no talent and no skill whatsoever. Dem boys seh all you got to do is to be friendly or become friendly or be wid a-wee government people like Babbie, or be a family member, like Rob de Earth.
These are de people who does get Guyana gold medal award, gold contract and gold concessions. When it comes to de silver medal, award, de second best that does go de party loyals and stooges. You got to be ready to go to front fuh cover de tracks fuh crooked deals. Dax is one; Dem Brian is another set; and nuff others.
De bronze medal award does go to de party hacks who always trying fuh win votes and who does always cook fuh when de big ones visit.
Guyana got one more medal than de international body and that is called de Cappa award medal. That does go to some of dem big boy and big gyal in all dem state media, ministries, government organizations, corporations and state agencies.
Dem boys got a special award fuh all of dem come next week.
De GPHC should get an award too fuh keeping de most abandoned dead baby. Dem got so much that lef in de mortuary that one man go yesterday and couldn’t find he nine-day baby.
Dem boy seh that dem got some mothers who drop dem and walk away, something that even dog, don’t do.
Talk half and beg all dem woman fuh pick up dem pickney at de mortuary before dem boys start publishing dem names and photo like wha dem do Babbie, Dax and de Devil.