Dem boys seh...Donald term winding down

Dem boys seh…Donald term winding down

Jan 21, 2015 Dem Boys Seh, Features / Columnists, News

Donald is a strategist. He smart suh till people can’t come near to imagining that is de same Donald who does tek instructions from everybody else. De fuss thing he do was call de Shaat Scamp and tell he to lower de cost of fuel. That mean that he tell de Shaat Scamp to mek sure that de gas price go down.
Then he name elections date. He throw down de challenge to de opposition parties.
Everything down. De other day people try to go pun de internet and dem couldn’t. GT&T was down, suh no WhatsApp and no BBM.
When de people try fuh warm up some food de microwave was down. Dem boys thought that de microwave spoil, but was GPL down. And wasn’t a case of rain fall down and some pole come down; was de whole GPL down.
If wasn’t fuh de Waterfalls paper de whole country woulda shut down, because de opposition was lying down. In fact, ever since Donald shut de parliament down all dem parliamentarian was wining down.
And while that was happening de police was beating criminals down. Dem boys seh that all de beating down come about because dem got some hard ears criminal.
And talk fuh rain, talk fuh sun, Kwame refuse to tek a back seat. He spending a lot of time running li’l boys down and while he doing that some people who in high places busy throwing li’l gyal down.
According to dem boys that is not de end of de story. De Chinee coming down, de army helicopters down, and de hospital rundown because all de drugs done. Babbie seh that de contract shut down suh health care down. All systems fall down.
Dem boys seh that so much things deh down that some men wondering if dem can mek dem wife happy when she lie down—to sleep—wid so many things falling down and some of dem staying down. Even Rohee standing down from challenging Donald.
Talk half and watch how Donald gun now sit down.