Dem boys seh...Jagdeo and Brassington plan to buy out Hap New

Dem boys seh…Jagdeo and Brassington plan to buy out Hap New

Dec 28, 2014 Dem Boys Seh, Features / Columnists, News

Strange things does happen round this time of de year. This is de time when people does mek wish and promise to stop doing some of de things dem use to do. That is dem resolution. Some of dem actually write special letter to Santa.
Dem boys seh that normally people does pray but two people decide to write to Santa because both of dem claim that prayer don’t wuk, how dem pray long and hard and not much happen. One of de two people was a man who was going to church every day, twice a day. That is how dem two people write de letter pun dem phone and send it by e-mail to Santa.
None of dem didn’t bargain that dem boys woulda get de mail de same way like how dem get de e-mail wha C fuh Satar sent to Anil and Jagdeo. De woman write, ‘Dear Santa, this year I would like a big fat bank account and a slim body. Please. Don’t get dem mixed up like you did last year.’ When dem boys check de letter wha de man write is de same thing, word fuh word.
Dem boys seh that dem know de lady bright because she controlling education suh it got to be that de man accustom to copying wha he see people do.
That is how from de time dem boys read de letter dem didn’t have to see who sign dem. Dem know fuh sure that one of dem was Brassington. He copy a lot of Jagdeo scampish ways. Brassington and Jagdeo so scampish that dem nah only corrupt de Bees in de Pee Pee Pee and in de business community, dem also corrupt almost all de Bees in Hap New.
Dem boys hear in de grape vine that dem done share out a lot of money to plenty of dem in Hap New. Corbin is a Cee and he gone. Dem boys ain’t saying where he gone and why he gone. De Bees in Hap New dem know fuh sure that some of dem collect already.
Now dem wukking pun de other letters like Gee, H, Jay and Kay too. De Gee got de same height and use to do de same wuk wha de shaat scamp doing.
De H is a lawyer like Anil, de Jay is a lawyer too and de Kay is a teacher, not like Kwame. De three planners seh that when dem done wid de people of Guyana Hap New and de Pee Pee Pee gun be de best buddies.
Dem boys have a saying—Good friends care for each other; close friends understand each other; but true friends stay forever beyond words, beyond distance and beyond time.
Talk half and pray and keep you eyes pun de blood suckers.