Dem boys seh... Jagdeo and Brassington evil plot exposed

Dem boys seh… Jagdeo and Brassington evil plot exposed

Dec 14, 2014 Dem Boys Seh, Features / Columnists, News

There is a simple old people saying and everybody know it but some people does forget it. Jagdeo know it, Brassington know it more than anybody else because he was in de church every day.
When dem boys use to see he going there all de time dem didn’t realise that he was begging fuh forgiveness fuh all de scampish things that he do.
De saying is that whatever people do in de dark does come to light one day. Wha you do behind closed doors does be exposed. Ask Brassington and dem other pregnant woman.
When Jagdeo and Brassington plan fuh tek over de whole Guyana communication network and put GT&T out of business dem believe that nobody woulda ever see, hear or know.
Dem plan that takeover in a room specially built in Ohh Pee. It’s called de Evil Room wheh de evil people of society meet. The president of de people who meet in that room is de man who resemble de devil.
De room get de name Evil Room just like how dem got de Blue Room and de Credentials Room.
A lot of things plan in de Evil Room. Every shady, wicked and underhand deal, to rob de people of this country, is planned in that room. Dem boys hear that Donald Duck start ducking in de room.
Dem ain’t certain if he is a participant or an observer of what taking place.
When Brassington and Jagdeo was planning dem never believe that dem plan woulda come to light and get expose so clear for all to see.
Today, one of de evil plot get exposed. It show how Jagdeo spend more than $20 billion from our Treasury fuh enrich he self, he friends and family and de same Brassington.
More things gun get expose from de Evil Room by de evildoers. That is wha dem boys seh. De heist of de nation got this story but de plot wasn’t as clear as it is now.
Dem boys seh that dem gun frame de front page wid de story and send it to all de world leaders. Dem gun skip de few who do scampish things like Jagdeo.
Dem also plan to put it in de museum in de rogue’s gallery section, just to remind de country and dem school children of de rogues and vagabonds that ran this country.
Dem boys hope that Donald Duck tek note and duck out de Evil Room before he end up in that same rogue’s gallery.
Merry Christmas to Jagdeo, Babbie and Brassington, de three little drummer boys.
Talk half and wait fuh more scampish things come to light.