Dem boys seh...Anil mek Putagee tun Chat-3 too

Dem boys seh…Anil mek Putagee tun Chat-3 too

Nov 03, 2014 Dem Boys Seh, Features / Columnists, News

Since Anil mek de Guyanese people get wise, nuff of dem start fuh find dem real roots. Sunday, nuff people tun up to pay dem last respects to Navin, a good man who get cut down too soon. People come from all about because Navin touch nuff of dem.
He was so simple that everybody had something good to seh bout he. Anil and Navin sit down together in Parliament suh Anil had to go to de funeral but he didn’t stay too long. He just show he face at de Conference Centre and lef before de funeral ceremony end. One man seh that he look sick but de rest of dem seh that he shame.
Dem same people seh that he hear de police looking fuh Lall and dem now know that it can’t be Glenn Lall because he was all over de place. It got to be some other Lall, like Nandlall.
But everybody seh that Anil mek people know who they are.
De other day Adam realize that he is a black Chat-3. Well, Walter de Wicked Willis been to Navin funeral because he know de man ever since he small. De Waterfalls boss man been to de funeral too. That is how he meet Walter de Wicked Willis.
Walter tell de boss man that de nation should give Anil a national award fuh helping people fuh discover demself. He seh that he, Walter, find out that he is a Putagee Chat-3 and he wife searching fuh see wheh she fall because she mix up wid everything under tree.
And while Walter was talking bout he place, people come up to shake he hand. Poor Walter start fuh wonder wha happen because when everybody shake he hand, all of dem looking down to de ground. One man even point. De road leading to de cremation site was fully paved. Dem boys seh that it pave suh nice that everybody coulda walk in. Was no more mud dam that use to keep out some people from walking in.
De road do suh nice that people seh that if Navin, who was just an adviser, dead and dem mek de road suh nice, dem wonder what will when de man who look like de devil crap out.
Talk half and see if dem got any Amerindian Chat-3. Dem got some white ones.