Dem boys seh... Cee fuh Satar left alone in de air

Dem boys seh… Cee fuh Satar left alone in de air

Oct 24, 2014 Dem Boys Seh, Features / Columnists, News

Cee fuh Satar is a very decent man, and dem boys believe he is; that’s why dem does pray fuh he, de man wha resemble de devil and de other one who he tell that we in this thing together.
He suh decent that he write a letter to de Chronicle and sign he name as Staffer. When de Chronicle publish de letter he tun round and seh that he had to tek action.
Well dem boys give he a whole front page news item yesterday and today. Dem boys know that yesterday was not he holiday, was holiday fuh de same man who he got to tek action ‘gainst. Suh nobody didn’t he expect he to act yesterday.
Dem boys seh that he got today, Friday, fuh start de action, because this one clearer than day. He ain’t got to wait till night like wha he do when he move pun dem legitimate people who live yah.
A decent man like he does escape disaster. Dem boys hear that he going after Bai Shan fuh dem fancy vehicle dem bring in without paying anything and wha dem seh gun do dem wuk in de back dam.
Donald want to know how dem vehicle can wuk in de bush, suh he ask this decent man who suddenly start fuh stammer. Dem boys hear that Donald seh don’t worry talk, just go and find dem and tell me wha part of de bush dem deh.
That is how Cee fuh Satar end up in a two-seater plane wid just de pilot heading to de interior. When dem deh over de Essequibo River de pilot faint and Cee fuh Satar start fuh halla. “Help me, help me. De pilot get a heart attack and I don’t know how to fly de plane. Help me; help me please.”
He hear a voice over de radio saying this is de Air Traffic Control and I have you loud and clear. I will talk you through this and get you back on de ground. “I have had a lot of experience with this type of problem. Now, just take a deep breath; everything will be fine. Just tell me your height and position.”
Cee fuh Satar seh, “Me is five feet four, and me in de front.”
De Air Controller pause; then he seh, “Repeat after me, Our Father, who art in heaven…”