Dem boys seh...Some people waiting to strike like cobra

Dem boys seh…Some people waiting to strike like cobra

Oct 19, 2014 Dem Boys Seh, Features / Columnists, News

Some people deh like cobra. Dem raise dem head and dem set, waiting to strike at de Waterfalls paper and de boss man fuh suck he blood. One cobra deh in jail already.
Wha dem don’t realize is that de Creatah is de only protector and he don’t sleep. De same Holy Book wha de fat crook and some others does read got a Psalm that seh, “Yea though I walk through the valley of the shadow of death I will fear no evil for the real Boss Man is beside me.”
He is de one who guide dem boys all de time. Is he pave de way fuh dem boys get all de email and de BBM and WhatsApp messages that shocking Guyana. When de rest come out it gun shock de whole world.
Dem boys hear that de government people had de Chief Marshal waiting to strike like a cobra and de man seh that he ain’t even a water snake.
Dem mek he sit down fuh hours in a car without a/c waiting fuh serve de summons pun de Waterfalls boss man last week. De boss man come to wuk late that day and by de time he come de Marshal was soaking wet.
He was suh happy he see de boss man that he run out de car and up de step. He nearly fall down and if de security didn’t catch he, de man woulda deh in hospital by now.
When he go back he cuss everybody, even Anil and Cee fuh Satar who seh dem in this thing together.
Donald and all talking bout inclusion. He seh that he want de opposition, civil society, and even de people in de mad house to come together. He hear Ebola on its way to Guyana and want all of dem fuh go to front. He think he can hide behind dem.
But dem boys got a better option fuh he—put de Bees in front. Dem like deh in front of everything. De like de attention. And believe it or not, if Ebola knock dem de whole country will vote fuh Donald de next day.
Talk half and wait fuh Donald line up de Bees at de front.