Dem boys seh...De Cow man get ketch wid he pants down

Dem boys seh…De Cow man get ketch wid he pants down

Sep 23, 2014 Dem Boys Seh, Features / Columnists, News

Monday was a day of mourning fuh de man who like dig shit pun people. De man spread he wings like a hawk just de day before, talking how he does operate within de law and how he got de power to share information wid de president.
When dem boys drop a piece of de bombshell, right away he tell Seelee that he can’t go pun leave. “Don’t proceed. I deh in deep shit and you got to help dig me out.”
Seelee ask wha happen and de man ask you mean fuh tell me you don’t know? Dem boys hear Seelee then tell de man that he know was only time fuh you. When you been pun leave and you use to call me and give me all dem dutty things fuh do, I use to put you pun speaker and lef me door open because me want people fuh hear that you is de devil, not me.
“I hear when you call some Anil and you was whispering. I know you is a man who does send e-mail and shout at de top of you voice. It look like something chop you tongue. Me ain’t know is de Waterfalls paper that you pick fight wid. You try deh.”
Dem boys seh that de first thing he do when he go to de office Monday morning he start vacuum de office. He shoulda start vacuum he house, first.
De second thing he do, he tell he secretary that nobody must enter his office wid any electronic device, be it telephone, Ipad, Iphone, or eyelash. He seh that now he want he office just like de US embassy, dem same people who he write and ask fuh information pun some people de other day. De Ambassador, Mr Hunt, promptly put he to he place.
He frighten fuh even belch or fart in he office. Monday, he staff see him holding he belly and running out of he office to de back of de building. Is when he pass back dem get a smell and know wha he went to do.
Now he want everybody, even Donald and de Rat fuh tek a lie detector test fuh find out how that thing he send get in de newspaper Monday; that thing that expose he wicked, evil and devious self.
De whole country know that he get ketch wid he pants down, he can’t pull it up and de people who he tell, “We are in this thing together,” run and lef he wid he pants down. That is wha you call evil and good friendship.
Talk half and remember “We are in this thing together, Cow buddy.”