Dem boys seh...Ramroop spreading over Guyana like a cancer

Dem boys seh…Ramroop spreading over Guyana like a cancer

Sep 15, 2014 Dem Boys Seh, Features / Columnists, News

When blind man seh that he gun pelt you, he already got brick in he hand. iNet announce how it supplying de whole government wid internet. Dem boys know that de government use to get internet from GT&T. De government also get all dem mobile phone from GT&T.
Suddenly Ramroop announce that he supply de whole government wid internet. Luncheon then tell reporters that government still getting internet from GT&T and that he know because he does sign de cheque every month.
But people know that once Ramroop seh that he supplying de government that gun be de case because he know wha he saying. He know that de plan that he and Jagdeo got is to control de whole of Guyana.
Dem already controlling radio because Jagdeo give he five frequency and mek he de only private media house fuh control Guyana wid radio.
Ramroop got de only private television that controlling de whole country. He already controlling de learning channel.
He controlling cricket and he got one of de only three uplink facility in de whole Caribbean. De uplink is wha does send up signal like when cricket playing in Guyana. Long time people had to bring in dem own satellite dish. Ramroop got that.
This same Ramroop try fuh tek over GCC and is only because dem boys talk that he get shame and change he plan. Dem boys believe that he only biding time because he gun come back again when GCC really run down.
Ramroop controlling all de drugs that de country want because de tender people create de conditions fuh Ramroop get exclusive rights. Dem boys seh that that is another story because de same Luncheon announce that Ramroop get de exclusive right to supply drugs.
Now de Ministry of Health seh that it ain’t know nutten bout that because nobody ain’t tell de Ministry nutten. But this is a case of de blind man and de brick. It gun happen. Ramroop got control of de printing because he printing all dem tickets and dem poster and flyers.
Because of de control dem boys seh that this plan was in de making fuh years that is why this alliance name Ratroop. Is rattish behavior but what else people can expect from de rat and he clan?
Talk half and watch how Ratroop growing like a cancer, spreading its tentacles all over Guyana.