Dem boys seh...Donald fire another thiefing company

Dem boys seh…Donald fire another thiefing company

Sep 10, 2014 Dem Boys Seh, Features / Columnists, News

When dem boys talk de Bees and all dem who know how to rob de treasury believe that dem does talk fuh talk sake. From de time de government run and give Surendra de contract fuh dem pumps and then fuh de Specialty Hospital dem boys know that something kokish was happening.
Dem boys hear that Surendra pay some people in de government fuh get de contact and that is why Khemraj seh that de government shoulda shut down de contract. If you hear talk and cuss. Jagdeo join in de cussing. Because Khemraj was supporting de other Indian company even Rohee threaten fuh run he up to some parliamentary committee.
Well de bubble buss. Donald had to kick Surendra. Right away Surendra ask back fuh de money it pay as bribe to all dem people. Donald get vex and tell Surendra fuh find de money that it get from de parliament. Donald even tell de company that he tek cuss from de opposition.
This is de second company that Jagdeo and Brazzy pay advance to that Donald had to fire. He had to fire Fip Motilall.
But dem boys know what was going on wid Surendra and that is why dem advise de opposition to cut all de money that Ash Knee put in de budget fuh de Specialty Hospital. Now Donald announce that Surendra is nothing but a thief, that it been defrauding de government. Dem boys waiting fuh hear who and who Surendra been supporting wid de thiefing money.
Donald now carrying Surendra to court fuh fraud. This is de company that couldn’t even supply de pumps that Ramsammy order. And de thing is that Ramsammy been covering fuh dem, right up to last month. Now de saying is that everything Jagdeo negotiate had to be crookish.
And while Donald fighting wid Surendra somebody bun down Umana Yana. Dem boys suspect is somebody who got money in de Marriott because now dem can stand up outside de Uncle Sam embassy and see de Marriott clear.
But Tuesday afternoon, a member of de clan was singing, “I can see clearly now, de benab is gone. I can see all obstacles in my way.” Is NCERD and de lighthouse he was singing about.
Fuh sure, Cow Shit gun seh is de Waterfalls boss man burn down de Umana Yana because these days is everything Cow Shit seh he doing. Cow Shit gun ask he to pay duty fuh de ink that all dem newspapers import and using.
Dem boys seh that he like bat wha does tun he tail up top and seh that he sh***ing pun Gawd when in fact he sh***ing in he own mouth.
Talk half and watch de madness.