Dem boys seh... Thiefing people running mad or dying

Dem boys seh… Thiefing people running mad or dying

Sep 04, 2014 Dem Boys Seh, Features / Columnists, News

A long time now dem boys was watching things at Customs. At de time de boss man was a man name Lambert Marks. He was a soldier then he go away. Jagdeo bring he back and he was de man at Customs. Dem boys see some things and dem decide to talk. Marks get vex and he sue.

Well everybody know wha happen after then. He think bout dem boys all de time till something snap in he head. He try fuh set he house on fire; he family had to tek extra precaution wid he and in de end he can’t even think bout dem boys.

De people see another man tekking on dem boys and dem know that he is a man who does lose he head. But dem boys decide that he got good qualities suh dem ain’t gun fight he down. Dem know that de Creatah don’t sleep; that he deh pun dem boys side suh.

Yet dem boys can’t help thinking how everybody believe that dem can thief. Somebody decide that dem want wood suh rather than buy, dem decide fuh thief. De funny thing bout all this is that de man who sell de wood in good faith get lock up because he try fuh cash de bogus cheque that de thiefing people give he.

De Creatah don’t like ugly suh he mek de poor man father drive down de road and he happen to see de wood wha he son sell de thiefing people. Now dem thiefin people get ketch and dem got to face de law.

Well dem boys seh that dem hope that all who thiefing see wha happening these days. Some of dem who tek de money out of de Treasury and do wha dem think is dem own should tek note. Some of dem road people who believe that dem can be like de thieves in de government finding out that life ain’t no cakewalk. Some of dem dying too.

It reach de stage wheh dem boys want all of dem wicked people to know that all de thieves and wicked does either die or run mad. De Hana Rebel already start fuh pee in he wardrobe and pun he window. That could be a sign of something bad.

Talk half and watch how dem secret deals get uncover.