Dem boys seh...Money pass and people mouth shut

Dem boys seh…Money pass and people mouth shut

Aug 17, 2014 Dem Boys Seh, Features / Columnists, News

De whole government deh behind Bai Shaan and vex wid dem who busy trying to mek Guyana get a fair deal fuh whatever forest dem people cut down. Things reach de stage wheh one Minister, before he answer a question from a reporter, was stupid enough to tell de reporter that de Waterfalls paper probably beg fuh something and didn’t get it.
Then Donald seh that nuff people against investment. Dem boys want to know how de people paying fuh all de wood that dem cutting and shipping out of Guyana. But none of de government people ain’t answering de question because dem know that whatever payment was made went straight to de people who mekking de decision.
And dem who ain’t get pay don’t care if Guyana ain’t get its fair share because dem done get de paper. Is de first time dem boys see so much people lining up behind a foreign company. Dem other foreign companies never had that kind of support.
De same government claim how it love de Amerindian people and gun do everything to protect dem yet dem allow de Chinee fuh rob dem same Amerindians. De people deh fighting fuh dem money and de government ain’t helping dem fuh collect wha dem wuk for.
But de greatest thing is that Guyana sit down pun some of de most expensive wood in de world. Bai Shaan lef all about and settle in Guyana fuh ship out dem same expensive wood. If dem paying royalty then is just wha dem woulda pay fuh cheap wood.
And de Environmental Protection Agency still quiet. It never give permission but Bai Shaan get power from somewhere else and now de Environment people can’t seh a word.
But happy living nah long life.
Talk half and wait fuh de backlash.