Dem Boys Seh ... Pee and See pee up this weekend

Dem Boys Seh … Pee and See pee up this weekend

Jul 28, 2014 Dem Boys Seh, Features / Columnists, News

Is funny how people does talk bout fairness. Of course, dem boys know that de only fairness is in complexion. De Pee and See keep its congress. Every two years members does meet fuh see wheh dem come from and wheh dem going. Well this time when dem meet, dem didn’t see wheh dem come from and dem didn’t get a chance fuh see wheh dem going.

If GECOM ain’t ready then Pee and See certainly wasn’t ready. De first problem was wid de list. From de time Sharma and Norton open dem mouth and seh how dem gun challenge Granger de problem start. Norton and Sharma find that de voters’ list get change. De printer really had to wuk overtime.

Some people who name been pun de list suddenly find that dem couldn’t vote. Dem name fall off. One man seh that de only people who name fall off de list was de Linden people. When dem ask Granger is then dem find out that when dem travel dem lef dem name behind.

De elections done and now dem boys know why Pee Pee Pee was supporting everybody except Granger. Norton tell people how he disappointed and he ain’t gun challenge Granger this year because he suddenly find out that he and all name lef off de list although he paying he dues every year.

He holler fraud and tell dem reporter that de Pee And See really pee up.

De thing is that dem can’t find anybody who gun do investigation to find out wha went wrang. De AG seh that he busy trying fuh prepare he case against Uncle Glenn and Uncle Adam; de police seh that dem investigating three case and Nehaul Singh seh that he ain’t interested because nobody who got de problem ain’t dead.

Dem boys seh that times change. Lang time after congress de whole party use to march to Cuffy fuh a rally. Now de congress come and gone and people ain’t even notice. Dem ain’t got no more congress before election but dem boys sure that Pee And See gun talk about how de voters’ list got faults and Pee Pee Pee gun tell dem that dem own had fault too.

Talk half and tell Granger fuh hold over de congress.