Dem boys seh...De devil in hell resemble Jagdeo

Dem boys seh…De devil in hell resemble Jagdeo

Jul 06, 2014 Dem Boys Seh, Features / Columnists, News

Bobby want tek over everything, every major business and industry in Guyana. Bharrat set de stage in many area. Dem boys compiling a list which dem gun share wid everybody very soon.
Bharrat sell out de GT&T shares fuh bring in he padna in de same business. Dem know de power of telephone and de money that it does bring. Everybody know that wid telephone anything and everything is possible. You gun be able to mek a phone call to hell and heaven and talk to you family whichever one dem deh in.
Dem boys know fuh sure that dem ain’t going to heaven suh dem need Bobby phone system. Dem already trying fuh buy he phone card already. Dem warning him that he and Jagdeo got to keep a lot fuh demself. Dem phone call gun be long distance, not local.
Cheddi from Guyana, Eric Williams from Trinidad and Michael Manley from Jamaica all die and went to hell. Dem see a red phone and ask wha de phone for. The devil tell dem is fuh calling back to Earth.
Manley ask fuh call Jamaica and he talk fuh one hour. When he done, the devil who resemble Jagdeo, tell that the cost is one million US dollar. Manley write a check and give de devil wha look like Jagdeo.
Next, Eric Williams calls Trinidad and he talk fuh two hours. When he done de devil who still got Jagdeo face tell he that he bill is two million US. He too write a check and hand it over.
Cheddi tek de phone and he talk fuh ten hour. When he done devil who tun out to be de real Jagdeo tell he that de call is only three dollar.
When Manley and Williams hear that Cheddi talk fuh ten hour and only pay three dollar dem get vex. Dem nearly start a riot like that same man wha de police strip naked as he born.
De devil, Jagdeo, smile and tell dem since Donald tek over Guyana wha I lef, de country gone to hell, so it’s a local call.
Talk half and remember not to wear slack bukta like wha Naith Ram had on when de police pull down he pants.