Dem boys seh...Rodney $112M spend pun sleep-in, wine-in and dine-in

Dem boys seh…Rodney $112M spend pun sleep-in, wine-in and dine-in

Jul 02, 2014 Dem Boys Seh, Features / Columnists, News

Jagdeo lef Guyana in tutu or wha decent people does call mess. Is thiefing and scampish, corruption to de max left, right and centre in Guyana. Is everybody learn from Ohh Pee, who had one of de best teachers de world ever know.
Tek Luncheon special assistant. He deh behind bars because Luncheon nah bail he and he tun he back pon Kwame.
He live next to a store and he decide fuh bruck in through he bedroom and go shopping every night till he get ketch and land in prison. He had to learn from de best.
Jagdeo nah only lef Guysuco in a tutu, but also broke. Yesterday dem put out a statement that dem ain’t got enough money to pay staff. Today dem seh is not that dem don’t have money, dem sell de sugar and dem ain’t get pay, suh dem can’t pay.
Dem boys want know if is a rum shop or a cake shop dem running. Dem boys seh that Hen See Hen spend millions that dem coulda lend Guysuco fuh pay de staff rather than pay fuh football and allow Brian de Youth, a friend to Jagdeo and Brazzy, that fat crook, to enrich heself more.
Instead, dem complaining that dem can’t pay de cane cutters. And Donald don’t see those things. He does hear good, though, because he does sing karaoke at Sleep Out every now and again.
Dem boys want he hear wha people saying at de same Sleep Out bout de $112 million dem give fuh run de affairs of de Rodney inquiry.
Dem boys hear that three-quarter of de $112 million—which is $84 million—gone in Sleep Out. Dem bring in nuff Guyanese and put dem up there. Some of dem same Guyanese dem never call to testify.
One man wha dem bring fuh testify seh that he got he own house but when he hear dem putting you up at hotel giving you free food and free drinks and woman to wine and dine with, he could not say no.
He tell he wife in Canada, “Honey I got to go and testify fuh de benefit of all Guyana.” He was lying like Jagdeo always did. He was coming fuh he own benefit and de hotel owners—not Cliff and Ah Kneel.
Talk half and ask Donald to account fuh de $112 million.