Dem boys seh...Gee Nah producing people wid sticky hands

Dem boys seh…Gee Nah producing people wid sticky hands

Jun 26, 2014 Dem Boys Seh, Features / Columnists, News

Things really bad when Luncheon right hand get lock up and nobody ain’t even try to help he. De boy get ketch pun camera trying to get rich like some of he boss. He ain’t had access to de money from de treasury; he ain’t in a position fuh get kickbacks from dem contracts and he surely is no friend of Bharrat and de Bees fuh get a steady raise.
So de boy decide fuh try he luck outside and get ketch. Dem boys seh that right away Luncheon tell de shop man that de boy deh pun he own. De story didn’t have to go suh far but Donald seh that he ain’t getting mix up wid any corrupt transaction. Three years back de boy would walk away from any charge because he boss woulda mek one phone call and that woulda be de end of de matter.
A big one in Ohh Pee, when he hear de story, tell dem boys that when you mek you bed hard you got to lie pun it. De poor boy had to lie pun de floor in de Kitty lock ups. Dem boys want to know why he didn’t reach out to Kwame. After all dem is colleagues and birds of a feather. Kwame coulda reach out to de boy.
He might get blacklist like how de money laundering people planning to blacklist Guyana or like how some of de senior people at de Waterfalls paper get blacklist by dem boss. This thing happen to dem last week.
Just like Guyana who fail to carry out instruction and pass de anti-money laundering Bill, dem senior people fail to complete de paper before dem head home. Now de boss man ain’t talking he have nutten to do wid dem. He blacklist dem.
But fuh all that wuk still going on and nobody ain’t try a hustle like Luncheon pardner. It got to be that Gee Nah got a demon that does mek people get really attracted to money. Bharrat use to sit down and talk pun Gee Nah and he end up collecting nuff money.
Brazzy, Ash Knee, Rob de Earth, Irfaat all of dem had de Gee Nah connection and dem rich. This li’l boy use to wuk wid Gee Nah too, just like Martin. He and Martin get ketch but de others get away.
Talk half and watch you pocket wid people who wukking wid Gee Nah.