Dem boys seh...Donald like gossip

Dem boys seh…Donald like gossip

Jun 01, 2014 Dem Boys Seh, Features / Columnists, News

When de money laundering people tell Guyana that it get blacklist Donald, Granger and Ramjattan get confuse. When de people was threatening dem didn’t tek it fuh nutten. Not even Jagdeo, because he keep de Bill wrap up in a tissue pun he desk fuh a whole year till Donald get elect.
Dem boys watch this thing then dem hear that Ramjattan seh how de Hay Heff See can pass de Bill in 72 hours. Granger seh that he can do it in 48 hours. Brazzy, that fat crook, run and tell Donald fuh seh that he can pass de Bill in 24 hours.
Donald tun and call Granger fuh a meeting. Dem was to meet Friday but that postpone to Monday. Granger announce that he gun talk bout de money laundering Bill. Donald seh that he nah know nutten bout that.
Dem boys want to know wha dem gun talk bout. Dem can talk bout Brazzy.
He get two Chinee fuh put dem name as de private people in de hotel. De announcement confuse dem boys brain because dem boys did expect fuh hear a Lilawattie Roopram name.
Dem boys dream last night that Brazzy, that fat crook and Marcie, cut a deal wid de two Chinee people. Dem gun swap wha dem got in de hotel fuh de new lotto people in Guyana. Brazzy only use de people name fuh let Guyana believe that dem is de real owners.
In de same dream dem boys see how de Canadian people guh lose de lottery contract. Yesterday dem boys find out that all de time de Canadian people was getting month to month contract from Jagdeo.
Dem Canadian Lotto, like GT&T got to pack dem traps. And dem boys ain’t dream that one. De writing is clear on de wall, for all to see. Fuh those who blind, and who can barely see, dem boys gun tell dem everything.
Three big ones go to Donald and agree fuh confess bout de wrong things dem do. Dem ask he fuh pray fuh forgiveness and fuh keep it a SECRET. Jay start off by telling Donald that he hand fast and that he been thiefing people thing since he small.
De other one, Berry Berry, seh he like li’l gyal, that he is a child molester, and that he molest plenty.
Ganga confess that he is a womanizer, and how he go to bed wid all dem woman who use to wuk in and around he, right down to plenty of dem in de church.
When dem done talk Donald start fuh cry. Dem get worried and want fuh know wha happen. It tek de three of dem half day fuh calm him down. In between crying and sobbing, he blurted out to dem, ‘I got a weakness too. Me weakness is fuh gossip.’
Talk half and you-all know who was de first confessor.