Dem boys seh...De whole country looking fuh wuk

Dem boys seh…De whole country looking fuh wuk

May 25, 2014 Dem Boys Seh, Features / Columnists, News

Scampish and sweetheart deal is wha run things in Guyana. This thing start under Jagdeo and it continuing because Jagdeo lef he people in place.
When dem ask fuh investor fuh de Berbice Bridge dem never tell de ordinary people wha was de sweetheart deal dem coulda get. Is only a few people Jagdeo talk to and Bobby was one of dem. Brazzy tell he pardner at Foot in Foot.
Dem know wha dem was doing. De two of dem tek de taxpayers dollars fuh build de bulk of de bridge. Then when is time fuh profit sharing, de taxpayers ain’t get nutten but Jagdeo best friend, Bobby, and de others get de hog of de profit. If you think it done deh dem boys seh you lie. Jagdeo and Brazzy put in a clause that mek that profit tax free. That is de sweetheart deal fuh de bridge.
Dem got many other sweetheart deal. Dem boys seh that when dem check everything was a sweetheart deal under Jagdeo and if anybody got a doubt, dem can challenge dem boys.
De Marriott is a sweet man deal, sweeter than de Berbice Bridge. Dem boys did smell de rat from de time dem announce de hotel.
De boss man fuh de Waterfalls paper tell Ash Knee that he want to invest in de hotel. Brazzy did talk big and bold at a press conference how de Waterfalls paper was printing negative reports which pushing away any potential investors in de hotel. That is how de boss man call Ash Knee, de Finance boss man, and offer to invest a small piece. Ash Knee tell him up front, “This nah fuh you.” De boss man ask him wha he mean. He seh, “Glenn, we got fuh tek we time and sort out who we want—who we picking as investors.” Glenn ask him why and he go on to seh, “You in de newspaper business. We would prefer to tek somebody who got some knowledge about hotel business in front of any other investor because dem can mek a meaningful contribution.”
In short he was pushing aside de boss man because he was not one of de clique and dem know who dem want.
At last Brazzy, de fast scamp, seh that he find two man who come from Hang Kang. Brazzy seh that dem is de investor and that dem putting in US$8 million in de Marriott. It tek Brazzy, Ash Knee and Jagdeo three years and a day to name de so-called private investors.
Dem boys know that this is only a front to mislead all Guyana. Dem boys want to know which government anywhere in this world gun put in US$20 million of de taxpayers’ money in any venture, dem seh that a bank putting in another US$27 million, then de same government gun bring in two foreigner who dem seh putting in US$8 million and getting de major share and to own it in front of de taxpayer $US$20 million and de bank US$27 million.
Dem boys seh that only Jagdeo, Brazzy and Ash Knee coulda come up wid a plan like that and mek Donald believe in it.
An Israeli doctor says: “In Israel, medicine is so advanced that we cut off a man’s testicles, put them on another man, and in 6 weeks, he is looking for work.”
A German doctor says: “That’s nothing, in Germany we take part of a brain, put it in another man, and in 4 weeks he is looking for work.”
A Russian doctor says: “Gentlemen, we take half a heart from a man, put it in another’s chest, and in 2 weeks he is looking for work.”
De Waterfalls boss man laughs: “You all are behind us. Three years ago, we took a man with no brains, no heart, and no balls and made him President. Now, the whole country is looking for work!”
Talk half and pray fuh Guyana.