Dem boys seh...Uncle Adam got an old iron

Dem boys seh…Uncle Adam got an old iron

May 23, 2014 Dem Boys Seh, Features / Columnists, News

When things look nice in a country people got to talk nice things about it although that is not dem boys job. Dem boys job is to criticize and everybody know criticism does get de best out of anything and everything.
Dem boys driving pun de East Bank and dem see how de road look very beautiful. It mek people think dem drinking in a foreign land. Congratulations and best wishes to de people who come up wid that idea. But dem boys got to criticise. One, one of de reflectors deh out of line. De people who put dem down got kok eye or Benn heself was there when dem reflectors was being put down suh wha yuh expect? Certainly you can’t expect straight from Benn.
And Ash Knee got to pay fuh that ben up wuk. He tell dem boys that is not that wuk alone he got to pay for. He paying fuh a lot of kok wuk, and that come out of he own mouth yesterday.
Now dem boys want ask he why would he pay anybody- contractor and supervisor – for a job that wasn’t well done? He is either a fool or he been getting a kickback on dem projects. Dem boys seh that certainly he don’t sound like a fool.
Dem boys know that if he daady lef he fuh supervise wuk pon dem roof and de wuk ain’t do good because as soon as de rain drizzle de house start fuh leak, he daady gun kill him. He ain’t mekking that mistake.
Suh da crap wha he tell de CDB yesterday that dem supervisors on de job incompetent and he still paying dem wid de taxpayers dollars, Donald should got he packing he bag and running not only up de road but out of Guyana.
Dem boys want to know why he talking only now when de same thing was going on since he became a Minister. That is more than food for thought. He believe that stupid man live in Guyana and he is de only smart one dem got.
Some old people smarter than he. Dem boys seh that de fat crook, Brazzy, got a li’l buddy walking round Alexander Village looking fuh scrap iron to buy.
He tun up at Uncle Adam yard and seh, “Uncle you nah got no old iron you want sell?”
Uncle Adam look at he and seh give me couple months and come back. Me iron guh dead.
Talk half and tell Ash Knee fuh stop mekking people fools.