Dem boys seh...De Americans tell Donald, ‘Till death do us part’

Dem boys seh…De Americans tell Donald, ‘Till death do us part’

May 06, 2014 Dem Boys Seh, Features / Columnists, News

When mosquito pick war wid elephant dem does only get one winner. And if de mosquito get too close to de elephant behind is only one flick of de tail does get rid of de pest. Guyana is like a mosquito. Ramjattan remember de days when Uncle Cheddi use to call pun de Americans fuh help he change some of de things that Burnham use to do.
Burnham squeeze de opposition wid newsprint and Cheddi use to call pun de Americans fuh help. And de Americans use to tell Burnham how he wrang. In fact, when Cheddi tell de Americans that Burnham rig enough elections de very Americans get involve in de elections.
Now Cheddi party, wid Donald as de leader, doing a lot of stupidness. And de stupidness start even before Donald tek over. Radio licence give way, reporters who ain’t wukking wid de government get squeeze. In fact, Rob de Earth carry dem till in de back dam and leff dem because dem talk how he can’t account fuh money that he claim how he spend pun project. De Americans notice this but dem ain’t seh nutten.
Then Jagdeo share out radio and he ain’t give nobody who ain’t belong to de party or who ain’t he friend. De Americans talk last year and nuff people get vex. Ah Kneel get vex and he mouth slip. Right away Jagdeo call he. And was after midnight. Dem boys call de story, ‘De Midnight Cuss Out’.
Now de Americans talk again. Dem notice that people who apply fuh radio licence fuh more than 20 years still can’t get approval. And because dem talk, Donald get vex.
But he did vex before. Dem boys seh that greedy man does vex two times. Dem does vex when other people get and dem does vex when dem get but got to share. That is why Donald get vex wid de radio licence and wid de programme wheh de Americans spending dem money wid people other than de government.
Donald get vex and he revoke visa. One American seh that dem don’t have to come to Guyana but everybody in Guyana want to go to de States. Now he gun get vex when de Americans close down dem visa section to government people.
Dem boys laugh when Donald party seh how America an de Ambassador meddling. Is dem who invite de meddling when dem been in de opposition. Old people seh that if you good fuh bed, you good fuh wed. Donald can’t lef de Americans just like that. And in any case dem ain’t tekking lef.
Talk half and tek wha you start.