Dem boys seh...Every holiday is madness

Dem boys seh…Every holiday is madness

Apr 23, 2014 Dem Boys Seh, Features / Columnists, News

Every holiday people does get real crazy. Dem who does drive pun de road does behave madder than de people who live in Fort Canje. And some of these same people is national leaders. Ash Knee drive he car two holiday in a row and knock up other people car.
To this day de police can’t do de right thing because dem claim how dem got a protocol fuh dealing wid de big ones and dem got one fuh de ordinary people. Ordinary people can’t lef de scene of an accident but big ones can run away and comeback next week.
Dem had one name Ganda who in true fashion drive and crash up a man car pun Carifesta Avenue. Just like Ask Knee, he fork out money and buy a new car fuh de man. To this day de police never even write a charge sheet.
Good Friday come and gone and is only because nuff people wasn’t on de road that nobody had anything to report. But by Saturday was madness. People just step out dem house and was like dem car and minibus was hiding round de corner and waiting fuh dem. Suh when dem step out de house was knock down. Some of dem who get knock down dead.
Sunday was de same thing, but Monday tek de cake. Car slam into car and knock dem in some trench. Car drive into canal and driver ain’t know he head from he foot. Dem boys seh that is only because Donald tell some people not to drive, that dem must use drivers, mek dem ain’t had more accidents.
Then dem had de murders. In two day four people dead. A man kill he wife and heself; a man kill he brother and a woman kill she husband. De thing sound like if people killing fowl.
A writer name James Baldwin did write a book name Fire Next Time. Well that is wha some man telling dem woman whenever de woman talk. One woman get vex because she husband refuse to bring in money to put food pun de table. De mistake she mek is to walk away just to ease de quarrel. Was fire next time. De man bun down de house.
Dem had a fire at Nabaclis. A woman use to live wid she children and always leffing dem home. Neighbours always use to tell she, fire next time. Dem words didn’t even drop and was fire. De lady got to live wid neighbours.
Dem boys seh that dem wonder whether it worth celebrating dem holiday when death deh lurking round de corner.
Talk half and watch out fuh dem wild people.