Dem boys seh...Donald investigation mek people get sick

Dem boys seh…Donald investigation mek people get sick

Apr 21, 2014 Dem Boys Seh, Features / Columnists, News

Today is Easter and plenty li’l children deh flying kite. Dem boys want tell dem parents fuh mek sure that dem pickney keep far from de electric wire.
But de state in which Brazzy and Jagdeo got GPL in most time de lines don’t have current. But please, don’t tek chance wid alyuh children. Dem is people you should never trust wid a dollar, much less you children life. Suh keep you eye open and don’t mek none of you children get shock.
But some people get a different shock when dem hear Brazzy put out statement that he gun investigate de Leonora land deal. Under Jagdeo leadership that word investigate was just talk. He and he kavakamites, including that same fat crook, Brazzy, do de gods to Guyana and none body ever talk bout investigate.
Dem boys remember de clerk who buy a $60 million house pun a $40,000 a month salary. When that was brought to Jagdeo he seh that he gun investigate. De police or GRA never get call in because Guyana woulda hear something. Instead he, Jagdeo, promote de woman husband.
Of course dem boys also remember de $69 million NIS building in Berbice. Again Jagdeo seh that he gun investigate. He did investigate. He investigate Luncheon fuh find out why he, Luncheon, give de Waterfalls paper de document. Is that wha mek Luncheon sick on to today.
Brazzy and Pall getting sick too. Brazzy seh he nah know Ed change plans. Pall, who use to head GuySuCo, seh he nah know, too, but every single day he does pass deh at least two times and had to see de sign board.
Dem boys seh even if he miss that, he had to see house going up instead of wood processing plant.
He got to be blind, deaf and dumb because de whole of de West Coast know. De thing also deh in all dem newspapers. Suh dem boys want to know how de eff y’aall don’t know.
But is de instruction wha Donald give that getting dem sick. He talk bout investigation.
Brazzy do de sweetheart deal fuh Jagdeo wid Ed, de fraudster, in New York.
When Donald done wid he, he gun forget he pants size just like how Jagdeo forget if he did going to rodeo or regatta.
He know that Ed squeal pun Meeks, de Congressman in de US and dem boys hear that Ed also squeal pun Jagdeo and Brazzy. He still squealing and that is why he ain’t gone to jail yet.
Happy Easter to all Guyana except dem scamps, crooks and de Bees including Bobby, Boyah, Bharrat, nuff Brian—coolie Brian, Chinee Brian and black Brian.
Talk half and fly dem kite safe.